Ausum við mat í rotturnar?
Heimild: 
Júlí 2013
Reykvísk rotta mbl.is/Sverrir Vilhelmsson
Meindýraeyðar Reykjavíkurborgar sinna daglega útköllum vegna rottugangs í Reykjavík. Að sögn meindýraeyðis geta rotturnar náð 40-50 cm lengd með búk og hala. Hann segir að rottur lifi alla jafna í holræsum hér á landi ólíkt því sem gerist erlendis þar sem þær eru gjarnan í náttúrunni.
Guðmundur Björnsson rekstrarstjóri meindýravarna hjá Reykjavíkurborg segir að fólk hér á landi hafi að jafnaði fljótt samband ef það verður var við rottugang. „Við förum á hverjum degi í rottuútköll. Í fyrra fórum við í 320-350 útköll og það telst nú ekkert sérstaklega mikið,“ segir Guðmundur.
Rottulaus svæði austast í borginni
Hann segir að rottugangur sé um nær alla borgina en úthverfin verði þó síst fyrir barðinu á þessum óvelkomna vágesti. „Það eru rottufrí svæði austast í borginni, en frá Elliðaá og vestur úr má finna rottur,“ segir Guðmundur. Hann segir að útköll séu ekki tíðari í einu hverfi umfram önnur.
Guðmundur hefur sinnt þessu starfi í um 20 ár og man ekki til þess að mikið tjón hafi hlotist af rottum þó þær eigi það til að naga „eitt og annað.“ „Ef það eru opin niðurföll t.a.m. í þvottahúsum þá er verið að bjóða upp á að þær komi inn til fólks. Rottur eru nær eingöngu í lögnum hér á landi og er það nánast séríslenskt fyrirbæri. Erlendis eru rottur gjarnan í umhverfinu þó einnig megi finna þær í holræsum, en hér eru þær eingöngu í holræsakerfinu og lítillega í fjörunni. Þær komust inn í skólplagnirnar fyrir áratugum síðan og það er þeirra svæði,“ segir Guðmundur.
„Við erum að ausa mat í rotturnar“
Hann segir að í lögnunum sé næg fæða fyrir rotturnar. „Allur matarúrgangur og fleira sem fer þarna í gegn er fæða fyrir rotturnar. Við erum að ausa mat í rotturnar. Erlendis er mun meiri fæðu að finna á yfirborðinu. En ef við fáum útkall þar sem tilkynnt er um rottu í garði, á það nær undantekningarlaust rætur að rekja til bilunar í lagnakerfi í húsi nærri viðkomandi garði. Þær hlaupa stundum um á yfirborðinu til að leita sér fæðu en fara svo alltaf í niðurföllin aftur. Þar búa þær,“ segir Guðmundur. Hann segir að stundum fari rottur inn í vistarverur fólks í fæðuleit.
Ástandið betra en annars staðar
Guðmundur segir að ástandið hér á landi sé betra en víðast hvar annars staðar í heiminum og rottum sé að fækka frekar en fjölga. „Það eru sveiflur í stofninum, en kúrfan sýnir að þeim er að fækka. Ég hef sagt það undanfarin 5-6 ár að það sé ekki hægt að sýna fram á lægri tölur en alltaf virðist þeim fækka og það gefur til kynna að vel sé staðið að þessum málum hér,“ segir Guðmundur. Innandyra nota meindýraeyðar borgarinnar gjarnan gildrur en utandyra er notast við eitur til þess að ná rottunum.
Að sögn Guðmundar er algengast að Reykjavíkurborg sinni því að drepa rottur og geri hún það frítt. Einnig séu þó einkaaðilar sem taki að sér slík verkefni.
