Mál nr. E-6790/2023 – Leki frá frárennslislögnum

Stefnda keypti íbúð af stefnendum en hélt eftir afsalsgreiðslu þar sem hún taldi að rakavandamál væri til staðar í íbúðinni. Í söluumboði íbúðarinnar hafði komið fram að fyrirhugaðar væru viðgerðir á frárennslislögn á vegum húsfélags fasteignarinnar og fóru þær fram fyrir afhendingu íbúðarinnar. Eftir afhendinguna taldi stefnda að umrædd viðgerð hefði ekki tekist og hélt eftir afsalsgreiðslu. Tæpum níu mánuðum eftir afhendingu íbúðarinnar lét stefnda stefnendur vita með sólarhringsfyrirvara að fagaðilar á hennar vegum myndu skoða íbúðina næsta dag til að kanna orsakir rakans. Eftir þá skoðun fóru fram viðgerðir á frárennslinu á vegum stefndu og verður af gögnum málsins ekki annað ráðið en að stefnendum hafi ekki verið gert fyrirfram viðvart um að þær viðgerðir stæðu til. Stefnendur höfðuðu mál til greiðslu afsalsgreiðslunnar en stefnda krafðist sýknu þar sem íbúðin hafi við afhendingu verið haldin leyndum göllum og að stefnendur hefðu ábyrgst að búið væri að laga frárennslislagnir. Stefnda aflaði ekki dómkvadds mats til staðfestingar á að raki hafi verið í íbúðinni við afhendingu, til staðfestingar á orsök slíks raka, til sönnunar þess að lekið hafi frá frárennslislögn né að fyrri viðgerð á vegum húsfélagsins hafi verið ófullnægjandi. Ekki var því talið sýnt fram á það með óyggjandi hætti gegn mótmælum stefnenda að rakavandamál hafi verið til staðar í íbúðinni við afhendingu, né hver orsök þess hafi verið. Var stefnda dæmd til greiðslu afsalsgreiðslunnar ásamt dráttarvöxtum.