Pípari kærir prinsessu – Ofbeldi, skilorð
Heimild: 
.
Hassa bint Salman
September 2019
Hassa bint Salman, prinsessan af Sádí-Arabíu og eldri systir krónprinsins og valdhafans Mohammed bin Salman, hefur fengið tíu mánaða skilorðsbundinn dóm fyrir ofbeldi gegn pípara í Parísarborg, að því er fram kemur á vef BBC.
Hún er sökuð um að hafa skipað lífverði sínum að lemja píparann, sem hún taldi hafa tekið myndir á heimili sínu. Píparinn sem heitir Ashraf Eid, segir að lífvörðurinn hafi bundið sig og neytt sig til að kyssa fætur prinsessunnar. Segir píparinn að sér hafi verið haldið í nokkrar klukkustundir í íbúðinni. Atvikið átti sér stað árið 2016.
Málið var tekið fyrir í frönskum dómstól í dag en prinsessan mætti ekki til réttarhaldanna. Alþjóðleg handtökuskipun var gerð út á hendur prinsessunni en dómstóllinn dæmdi hana fyrir að vera samsek um ofbeldi með vopni og mannráni.
Henni hefur verið gert að greiða tíu þúsund evrur í skaðabætur en prinsessan hefur ávallt neitað sök. Þá var 
lífverðinum, sem heitir Rani Saidi, dæmdur í átta mánaða skilorðsbundið fangelsi og gert að greiða fimm þúsund evrur í skaðabætur.
Saidi sagði dómstólnum í júlí síðastliðnum að hann hefði einungis verið að vinna sína vinnu. Prinsessan hafi kallað á hjálp og hann hafi hlaupið inn í herbergið, þar sem hann hafi séð hana og píparann, þar sem hann hélt á síma sínum.
„Ég greip hann og yfirbugaði hann. Ég vissi ekki hvað hann var að reyna,“ sagði lífvörðurinn. Hassa yfirgaf Frakkland skömmu eftir atvikið og eftir að handtökuskipunin var gerð á hendur hennar í mars 2018 hélt hún sig í Sádí-Arabíu.
