Þýska orkufyrirtækið wpd áformar að reisa allt að 532,8 MW vindorkuvirkjun á Brekknaheiði og Sauðaneshálsi í Langanesbyggð.
Hefur fyrirtækið lagt fram matsáætlun í skipulagsgátt, sem unnin er af Eflu, til kynningar vegna umhverfismats sem fara þarf fram vegna umfangs framkvæmdarinnar. Gert er ráð fyrir að allt að 74 vindtúrbínur verði reistar í áföngum á svæðinu.
Wdp hefur áratuga reynslu í þróun vindorkuvera og rekur vindorkuver og sólarorkuver um allan heim. Það opnaði skrifstofu á Íslandi árið 2022 og stofnaði sama ár dótturfélagið wpd Ísland ehf. sem hefur verið með nokkra vindorkukosti í þróun hér á landi.
Áætlað er að framkvæmdasvæðið á Brekknaheiði og Sauðaneshálsi verði tæplega 37 ferkílómetrar að stærð í landi Sóleyjarvalla, Hóls, Hraunkots og Staðarsels en þessar jarðir eru allar í eyði.
„Gert er ráð fyrir að allt að 74 vindtúrbínur verði reistar í áföngum, en gert er ráð fyrir að framkvæmdin taki um 5-7 ár með undirbúningsvinnu. Næsti þéttbýlisstaður við framkvæmdarsvæðið er Þórshöfn í Langanesbyggð, í um 3,5 km fjarlægð til vesturs frá ystu túrbínu vindorkuvirkjunarinnar,“ segir í samantekt í matsáætluninni.
Gætu hafist handa 2029
Gangi áætlanir eftir á að reisa 10 til 20 vindtúrbínur á hverju ári og gætu framkvæmdir hafist í fyrsta lagi árið 2029 en tekið er fram að aðkoma annarra aðila og önnur iðnaðaruppbygging á svæðinu geti haft áhrif á tímalínu verkefnisins og eða seinkað upphafi framkvæmda.
Ætla megi að um 70 til 80 störf verði til vegna framkvæmdanna, þar af 50 til 60 störf við uppbyggingu virkjunarinnar á framkvæmdatímanum.
Fram kemur í lýsingu á fyrirhuguðu verkefni og vindtúrbínunum sem reisa á að hámarkshæð hverrar með spaða í efstu stöðu verði allt að 210 metrar og þvermál undirstöðu hverrar vindmyllu verði um 30 metrar.
Tekið er fram að vindtúrbínurnar verði sérstaklega valdar með tilliti til íslenskra aðstæðna og veðurfars. Gera megi ráð fyrir að afl hverrar vindmyllu verði allt að 7,2 MW og árleg vinnslugeta þegar þær verða allar komnar í gagnið verði 1.965 gígavattstundir.
Umhverfisrannsóknir sem fyrir liggja, samráð við nærsamfélagið og gögn sem fengist hafa með vindmælingum, sem staðið hafa yfir frá því í október árið 2022 á Brekknaheiði, eru taldar gefa vísbendingar um að aðstæður og vindafar á fyrirhuguðu framkvæmdasvæði sé hagstætt til raforkuframleiðslu. Bent er á að vindorkuvirkjanirnar á Brekknaheiði og Sauðaneshálsi hafi verið tilkynntar til Rammaáætlunar en ekki verið teknir til umfjöllunar af verkefnastjórn.
Í nóvember sl. kynnti umhverfis-, orku- og loftslagsráðuneytið aðgerðir til að auka afhendingargetu og afhendingaröryggi raforku á Norðausturlandi og bent er á í matsáætluninni að Landsnet áformi að hefja undirbúning uppbyggingar á 132 kV loftlínu frá Kópaskeri til Þórshafnar. Fram kemur að raforkan sem vindtúrbínurnar framleiða verði flutt með jarðstrengjum og safnað í safnstöðvar á framkvæmdarsvæðinu. Þar verði spennunni breytt og raforkan flutt inn á flutningskerfi Landsnets í gegnum háspennulínur.
„Til greina kemur að nýta hluta orkuvinnslu vindorkuvirkjunarinnar, sem og orku frá öðrum nærliggjandi vindorkuvirkjunum, á fyrirhuguðu iðnaðarsvæði í Finnafirði eða öðrum iðnaði á svæðinu. Í Finnafirði er t.d. gert ráð fyrir framleiðslu á vetnisgasi með rafgreiningu vatns. Greining innlendra og erlenda sérfræðinga sýnir að rafgreining getur farið fram með beintengingu við nálægar vindorkuvirkjanir. Vegna áforma um iðnaðaruppbyggingu í nágrenni fyrirhugaðrar virkjunar þarf mögulega ekki að gera ráð fyrir styrkingu flutningskerfisins til að taka við allri framleiðslu vindorkvirkjunarinnar á Brekknaheiði og Sauðaneshálsi, sem og annarra fyrirhugaðra vindorkuvirkjana á svæðinu. Engu að síður þarf örugga og stöðuga orku fyrir a.m.k. hluta fyrirhugaðs iðnaðar á svæðinu,“ segir í umfjöllun um fyrirhugaða tengingu vindorkuversins við raforkuflutningskerfið.
Fleiri vindorkuver eru fyrirhuguð á svæðinu
Tilgangur og markmið framkvæmdarinnar er að auka framboð endurnýjanlegrar raforku með sjálfbærum hætti þannig að Ísland nái settum markmiðum sínum í orkuskiptum.
Hugmyndir eru uppi um fleiri vindorkukosti á Langanesi og víðar á norðausturhorninu. Í matsáætluninni er vikið að öðrum fyrirhuguðum vindorkuvirkjunum á svæðinu og bent á að á austanverðu Langanesi séu áform um 200 MW vindorkuvirkjun, Austurvirkjun. Tvær vindorkuvirkjanir séu fyrirhugaðar við Bakkaflóa, þ.e. Viðvíkurheiði (216 MW) og Sandvíkurheiði (302,4 MW).
„Einnig eru áform um 190,4 MW vindorkuvirkjun á Melrakkasléttu, Hnotasteinn. Möguleiki er á samlegðaráhrifum með fyrirhugaðri vindorkuvirkjun og þeim sem nefndar eru hér að ofan, t.d. varðandi landslag, óbyggð víðerni og ásýnd. Í umhverfismatsskýrslu verða samlegðaráhrif þessara þátta metin út frá fyrirliggjandi göngum um sýnileika,“ segir í matsáætlun Eflu fyrir wpd.
