Orka – Agerðarleysi kostar

Grein/Linkur:  Aðgerðarleysi í orkumálum kostar samfélagið mikið

Höfundur: Samtök Iðnaðarins

Heimild: 

.

.

Maí 2024

Aðgerðarleysi í orkumálum kostar samfélagið mikið

Sigurður Hannesson

„Ástæðan fyrir þessu er viðvarandi aðgerðaleysi um árabil í orkumálum. Þetta aðgerðaleysi kostar samfélagið býsna mikið. Við erum í þeirri stöðu að þetta verður væntanlega staðan næstu fjögur til fimm árin eða svo þar til ný eða meiri orka kemur inn á kerfið,“ segir Sigurður Hannesson, framkvæmdastjóri SI, í frétt Morgunblaðsins um þá greiningu að stjórnendur fyrirtækja í orkusæknum iðnaði telja að 14 til 17 milljarða króna útflutningstekjur þjóðarbúsins hafi tapast á fyrstu mánuðum ársins vegna raforkuskerðingar Landsvirkjunar.

Þá segir í fréttinni að slakur vatnsbúskapur Landsvirkjunar hafi orðið til þess að fyrirtækið gat ekki framleitt næga raforku og þetta sé mun meira tap en áætlað var í janúar sl. þegar útlit var fyrir að þjóðarbúið yrði af átta til tólf milljörðum vegna skerðinga á raforku. Ástæðan sé sú að skerðingarnar hafi staðið í lengri tíma og verið víðtækari en áður, en einnig hafi afurðaverð hækkað. Útflutningstekjur vegna skerðinganna sem nú er talið að hafi tapast eru 3,7% til 4,5% af útflutningstekjum orkusækins iðnaðar í fyrra og ef miðað er við efri mörk matsins svarar tapið til tæplega 5% af öllum útflutningi sjávarafurða á síðasta ári.

Einnig kemur fram í fréttinni að í greiningu SI segir að mest sé tapið hjá álverunum en þar sé það metið 9-10 milljarðar króna. Það sé um 2,8%-3,1% af útflutningstekjum áliðnaðarins á síðastliðnu ári. Skerðingarnar hafi bein áhrif til lækkunar tekna en einnig óbein vegna áhrifa þeirra á viðskiptasamninga. Einnig að tapaðar útflutningstekjur gagnavera séu metnar á þrjá til fimm milljarða.