Nýr val­kostur á hús­næðis­markaði – merkum á­fanga náð

Bjarni Þór Sigurðsson

Um helgina hélt ASÍ upp á aldarafmæli sitt. Við það tækifæri var kynnt nýtt samkomulag um uppbyggingu 1000 leiguíbúða á næstu árum.

Á þessu ári hafa borgaryfirvöld skuldbundið sig til að úthluta lóðum fyrir 150 íbúðir, 250 árið 2017, og svo 300 íbúðir á hvoru ári fyrir sig 2018 og 2019.

Það er skemmtilegt frá því að segja að verkefnið er komið svo langt að þegar liggja fyrir tillögur um eftirfarandi:

• Urðarbrunnur nr. 33-35 og nr. 130-134. Samkvæmt gildandi deiliskipulagi er heimilt að reisa á lóðunum 53 íbúðir. Lóðirnar eru byggingarhæfar

• Móavegur nr. 2-4. Breyting á deiliskipulagi í skipulagsferli. Áætlað er að heimilt verði að reisa á lóðarhlutanum um 50 íbúðir. Lóðin er byggingarhæf þegar breyting á deiliskipulagi hefur verið staðfest.

• Nauthólsvegur nr. 79. Breyting á deiliskipulagi í skipulagsferli. Áætlað er að heimilt verði að reisa á lóðarhlutanum um 40 íbúðir.

Mín fyrsta aðkoma að málinu var í stjórn VR árið 2011 þegar fyrstu skrefin voru tekin í þessa átt. Síðan hef ég unnið ötullega að þessu máli innan VR, ASÍ og borgarstjórnar. Hyggst ég beita mér áfram í húsnæðismálum ásamt öðrum framfararmálum innan verkalýðshreyfingarinnar.

Má þar nefna jafnrétti og baráttuna gegn óútskýrðum launamun kynjanna, að efla og tryggja aukinn kaupmátt í framtíðinni og styttingu vinnuvikunnar, starfsmenntun og sveiganleg starfslok svo eitthvað sé nefnt.

Þó vissulega beri að fagna þessum góða áfanga er margt óunnið í húsnæðismálum. Aðgengi að góðu húsnæði á viðráðanlegum kjörum eru mannréttindi sem öllum þurfa að vera tryggð – það er í eðli sínu kjaramál og því úrlausnarefni verkalýðshreyfingarinnar, stjórnmálanna og þjóðarinnar allrar. Nauðsynlegt er að valmöguleikar á húsnæðismarkaði séu sem fjölbreyttastir. Í raun er það svo að öruggt húsnæði á viðráðanlegum kjörum er ein forsenda byggðar hér á landi. Ef þörfum ungs fólks fyrir hagstæðu húsnæði er ekki mætt er hætt við áframhaldandi brottflutningi ungs menntaðs hæfileikafólks. Það mun draga úr möguleikum okkar til að byggja upp fjölbreytt og skapandi atvinnulíf, skapa neikvæðan þrýsting á lífeyris- og velferðarkerfi framtíðarinnar og ógna frekari uppbyggingu heilbrigðiskerfisins. Tryggjum að svo verði ekki.

Því er nauðsynlegt að huga að frekari uppbyggingu á leigumarkaði til að mæta vaxandi þörf og fjölga einnig valmöguleikum annarra tekjuhópa á húsnæðismarkaði. Fjölbreyttir valmöguleikar útiloka ekki hvern annan heldur stuðla að heilbrigðum markaði með eðlilegri verðmyndun öllum til hagsbóta.

Til að vinna áfram að þessu brýna hagsmunamáli VR félaga, og öðrum, þarf ég endurnýjað umboð þeirra og trúnað. Ég hef því boðið mig fram til áframhaldandi stjórnarsetu í VR. Kosningarnar standa yfir núna. Sért þú félagi í VR hvet ég þig til að nýta atkvæðisréttinn og vonandi á ég stuðning þinn vísan.

Heimild: Vísir