Meistaraskóli pípulögnum –  Stendur til að endurskoða eða leggja niður kröfur? 

Grein/Linkur:  Atvinnuvegaráðherra við fyrirspurn frá Nönnu Margréti Gunnlaugsdóttur um meistarabréf í pípulagningum

Höfundur:  Nanna Margrét Gunnlaugsdóttur

Heimild:

.

.

157. löggjafarþing 2025–2026.
Þingskjal 1250  —  495. mál.

Atvinnuvegaráðherra við fyrirspurn frá Nönnu Margréti Gunnlaugsdóttur um meistarabréf í pípulagningum.

Fyrirspurnin hljóðar svo:

Stendur til að endurskoða eða leggja niður kröfur um meistaraskóla hér á landi sem skilyrði fyrir útgáfu meistarabréfs í pípulagningum í ljósi þess að ráðherra telur að íslensk menntun í pípulagningum skuli lögð að jöfnu við meistarabréf frá Austur-Evrópu, sbr. greinargerð ráðherra vegna málaferla íslenska ríkisins og Félags pípulagningameistara?

.

Svar hljóðar svo:

Í lögum nr. 42/1978, um handiðnað, koma fram skilyrði fyrir útgáfu meistarabréfs til að reka iðngrein. Samkvæmt 10. gr. laganna skal viðkomandi hafa lokið sveinsprófi, unnið undir stjórn meistara í iðngrein sinni í minnst eitt ár og jafnframt lokið meistaraprófi í iðninni frá meistaraskóla.
Samkvæmt 2. gr. laganna má enginn reka handiðnað í atvinnuskyni á Íslandi, nema hann hafi til þess fengið leyfi lögum þessum samkvæmt. Samkvæmt 2. mgr. 2. gr. hafa, þrátt fyrir ákvæði laganna, ríkisborgarar eða lögaðilar aðildarríkja að samningnum um Evrópska efnahagssvæðið rétt til að starfa í handiðnaði á grundvelli skuldbindinga Íslands um viðurkenningu á starfi og starfsþjálfun í handiðnaði í öðru EES-ríki, svo og ríkisborgarar eða lögaðilar aðildarríkja stofnsamnings Fríverslunarsamtaka Evrópu ellegar Færeyingar eða lögaðilar í Færeyjum.
Þegar fram kemur beiðni frá aðila sem búsettur er á Evrópska efnahagssvæðinu um útgáfu sveinsbréfs eða meistarabréfs, skal skv. 3. mgr. 2. gr. laganna sýslumaður staðfesta réttmæti gagna um starf og starfsþjálfun eftir að viðkomandi félagi iðnaðarmanna, m.a. landssamtökum meistara og sveina, og ENIC/NARIC-skrifstofunni í Háskóla Íslands hefur verið gefinn kostur á að segja álit sitt og veita umsögn.
ENIC/NARIC-skrifstofan hefur það hlutverk að veita einstaklingum, háskólum, vinnuveitendum, fagfélögum, stofnunum og öðrum hagsmunaaðilum áreiðanlegar og nákvæmar upplýsingar um prófgráður, menntakerfi og matsferli í samræmi við þær matsaðferðir sem þróaðar hafa verið af ENIC/NARIC-samstarfsnetunum innan Evrópu.
Skilyrði fyrir útgáfu meistarabréfs hér á landi, fyrir erlendan aðila, er að fyrir liggi mat á því að viðkomandi hafi lokið sams konar námi í heimalandi sínu og hafi þá starfsreynslu sem til þarf, sbr. 10. gr. laga nr. 42/1978. Ekki eru í öllum tilvikum til staðar „meistaraskólar“, í skilningi 3. tölul. 1. mgr. 10. gr., fyrir tilteknar iðngreinar og hefur í framkvæmd verið horft til þess að bera saman við innlent nám það nám og þær námsleiðir sem í boði eru í viðkomandi löndum, auk mats á starfi og starfsþjálfun.
Ekki stendur til að svo stöddu að leggja niður kröfur um meistaraskóla sem skilyrði fyrir útgáfu meistarabréfs samkvæmt lögum um handiðnað. Almennt verklag og regluverk við útgáfu meistarabréfa er til almennrar skoðunar innan atvinnuvegaráðuneytis, í samráði við viðkomandi haghafa, í framhaldi af því að málaflokkurinn færðist til atvinnuvegaráðuneytis frá háskóla-, iðnaðar- og nýsköpunarráðuneyti í mars 2025.