Borgarfjarðarbrú 2026 – Endurnýjun og stækkun lagna

Grein/Linkur: Vandasöm vinna undir brúnni

Höfundur: Sigtryggur Sigtryggsson Mbl

Heimild: 

.

Það verður flókið fyrir verktakann Borgarverk og starfsmenn að vinna við þessar aðstæður með beljandi sjóinn fyrir neðan. Ljósmynd/Veitur

.

Apríl 2026

Vandasöm vinna undir brúnni

Veitur, dótturfyrirtæki Orkuveitunnar, hefja nú í apríl vinnu undir Borgarfjarðarbrú þar sem endurnýja og stækka á lagnir fyrir kalt og heitt vatn fyrir vaxandi samfélag í Borgarnesi, eins og segir á heimasíðu Veitna.

Framkvæmdin er samstarf Veitna, Rarik og fjarskiptafyrirtækjanna Mílu og Ljósleiðarans. Áætlað er að verkinu ljúki í nóvember á þessu ári. Óhjákvæmilega mun þetta leiða til talsverðrar röskunar á bílaumferð um Borgarfjarðarbrúna.

Lagnirnar, ásamt strengjum Rarik og fjarskiptafyrirtækjanna, liggja undir Borgarfjarðarbrúnni.

Aðstæður til framkvæmda undir brúnni eru því töluverð áskorun fyrir verktaka, þar er takmarkað athafnasvæði og áhættusamt að vinna.

Borgarverk er verktaki og verkfræðistofan Hnit sinnir eftirliti með framkvæmdinni, þar á meðal sérstöku öryggiseftirliti.

„Yfir vinnusvæðinu er Þjóðvegur 1 og brúin hreyfist með umferðinni. Undir lögnunum er straumharður sjórinn sem fylgir flóði og fjöru á þröngu svæðinu undir brúnni,“ segir á heimasíðunni.

Þar segir enn fremur að öryggismál séu ávallt í forgangi hjá Veitum. „Öll sem starfa fyrir Veitur eiga að koma heil heim og kröfurnar eru því miklar á verktaka að vanda til verka, hafa áætlanir og viðbragð í lagi.“

Veitur leiða verkið og það hefur verið í undirbúningi um þó nokkurt skeið. Kaldavatnslögnin flytur neysluvatn fyrir Borgarnes frá vatnstökusvæðinu á Seleyri, en þar stendur endurnýjun á dælubúnaði og mannvirkjum yfir.

.

Veitur ætla að tryggja að vaxandi samfélag fái nægilegt heitt og kalt vatn í framtíðinni. Því verður í sumar ráðist í að endurnýja og stækka allar lagnir undir Borgarfjarðarbrúnni. mbl.is/Sigurður Bogi

.

Lengsta stofnæðin

Heitavatnslögnin flytur vatn til húshitunar í Borgarnes og er tengd við Deildartunguæð sem er lengsta stofnæð hitaveitu sem þekkist á landinu.

Deildartunguæð, betur þekkt sem HAB-lögnin, nær tæpa 70 kílómetra frá Deildartunguhver að Akranesi.

Til að tryggja að Borgarnes sé tengt nauðsynlegum innviðum meðan á vinnu stendur þarf að leggja bráðabirgðalagnir fyrir byggðina og þeim verður einungis komið fyrir uppi á brúnni sjálfri.

Á meðan Veitur setja bráðabirgðalagnir verður einstefna á þjóðvegi 1 yfir brúna með umferðarljósum og hraði minnkaður.

Það er gert til að tryggja öryggi bæði vegfarenda og starfsfólks á brúnni. Sú vinna hefst í lok apríl og stendur fram í júní.

Þegar lagnavinnu lýkur í október verða bráðabirgðalagnirnar fjarlægðar að nýju og meðan á því stendur verður umferð aftur takmörkuð.

Þegar vinna hefst undir brúnni verður opnuð að nýju tvístefna á veginum en hraði takmarkaður. Það er gert til að minnka hreyfingar á brúnni til að þau sem vinna við lagnirnar geti athafnað sig af öryggi og tryggt góða lagnavinnu.

Borgarnes tilheyrir Borgarbyggð og er stærsti þéttbýliskjarni sveitarfélagsins. Borgarbyggð var stofnuð 11. júní 1994.

Í Borgarnesi búa nú um 2.000 manns og þar er blómlegt félags-, menningar- og atvinnulíf, eins og segir í samantekt á heimasíðu sveitarfélagsins.