Icelandic Glacial, sagan – 3,2 millj.tap, aukin sala
Grein/Linkur: Icelandic Glacial
Höfundur: Viðskiptablaðið
Heimild: 
.
Nóvember 2019
Vatnsfyrirtæki Jóns tapaði 3,2 milljörðum
Tap Icelandic Water Holdings jókst um 61 prósent á milli ára og nam 25,6 milljónum dollara árið 2018. Það jafngildir um 3,2 milljörðum króna. Jón Ólafsson er stjórnarformaður og stofnandi Icelandic Water Holdings en félagið tappar vatni á flöskur undir merkjum Icelandic Glacial í verksmiðju í Ölfusi.
Tekjur félagsins jukust um 17 prósent á milli ára og námu um 20 milljónum dollara, jafnvirði um 2,5 milljarða króna. Um 93 prósent teknanna má rekja til útflutnings. Tekjur vegna sölu á Íslandi jukust um þriðjung og námu um 1,3 milljónum dollara, jafnvirði um 160 milljóna króna. Á sama tíma rúmlega tvöfölduðust vaxtagjöld félagsins á milli ára og námu þau samtals 18 milljónum dollara í fyrra.
Fram kemur í ársreikningi Icelandic Water Holdings fyrir árið 2018 að hlutur Jóns hafi minnkað um 18 prósent á milli ára. Árið 2017 átti hann og tengd félög 23 prósenta hlut í fyrirtækinu en í fyrra var hlutur hans fimm prósent. Þau bréf voru veðsett bandaríska fjárfestingarbankanum JP Morgan.
Í samtali við Markaðinn segir Jón hins vegar að hlutur hans í fyrirtækinu sé óbreyttur. „Það er bara verið að gera það sem þarf til að hafa hlutina í lagi,“ útskýrir Jón.
Sonur Jóns, Kristján Ólafsson, á 18,5 prósenta hlut í Icelandic Water Holdings. Feðgarnir stofnuðu félagið árið 2004.
Hlutafé aukið um 31 milljón dollara
Við lok árs var eigið fé Icelandic Water Holdings 16,7 milljónir dollara og eiginfjárhlutfallið 13 prósent. Fyrirtækið upplýsti í ágúst að hlutafé hefði verið aukið um 31 milljón dollara. Núverandi hluthafar og aðrir lögðu félaginu til fé. Á sama tíma var upplýst að skuldabréfasjóðir á vegum BlackRock hefðu lánað fyrirtækinu 35 milljónir dollara.
.
.
Maí 2018
1,9 milljarða tap hjá Icelandic Glacial
Jón Ólafsson við átöppunarverksmiðjuna í Þorlákshöfn. MBL – Ragnar Axelsson
Icelandic Water Holdings hf. tapaði 18,1 milljónum dollara, sem samsvarar um 1,9 milljörðum króna árið 2016 og jókst tapið um 650 milljónir króna milli ára. Uppsafnað tap áranna 2011 til 2016 nemur 68,5 milljónum dollara eða 7,3 milljörðum króna miðað við núverandi gengi krónunnar. Þetta kemur fram í nýbirtum ársreikningi félagsins fyrir árið 2016. Félagið selur vatn undir vörumerkinu Icelandic Glacial og rekur átöppunarverksmiðju í Þorlákshöfn.
Salan aukist en kostnaður einnig
Rekstrartekjur félagsins, sem koma nær allar til af sölu erlendis, námu 1,6 milljörðum króna sem er aukning um 22% milli ára. Frá árinu 2013 nemur vöxtur rekstrartekna 69%. Rekstrarkostnaður jókst hins vegar til jafns við auknar tekjur árið 2016 og nam 2,4 milljörðum króna. Rekstrartap félagsins fyrir fjármagnsliði var nær óbreytt milli ára og nam 770 milljónum króna.
Þá voru fjármagnsgjöld ríflega 1,1 milljarður króna, hærri en fjármagnstekjur sem er hækkun um ríflega 700 milljónir króna milli ára. Eignir félagsins námu 133 milljónum dollara, um 14,1 milljarði króna í árslok 2016 og lækkuðu um milljón dollara milli ára. Stærsta eign Icelandic Water Holdings er vatnsból sem það metur á tæpar 100 milljónir dollara, ríflega 10 milljarða króna. Þá voru dreifingarsamningar félagsins metnir á, 21,8 milljónir dollara, um 2,3 milljarða króna. Skuldir námu 77,3 milljónum dollara og hækkuðu um 17 milljónir dollara milli ára. Stór hluti skulda félagsins er tilkominn vegna lána frá hluthöfum félagsins. Af 35 milljóna dollara skammtímaskuldum nema lán frá tengdum aðilum 15,5 milljónum dollara. Þá eru 17,6 milljónir dollara af samtals 42 milljóna dollara langtímaskuldum tilkomnar vegna skuldabréfa sem breytanleg eru í hlutafé og koma að mestu frá hluthöfum félagsins.
