Gróska – Hugmyndahús í Vatnsmýri

Febrúar 2017

Gróska, nýtt hugmyndahús í Vatnsmýri sem ætlað er að verða suðupottur nýsköpunar  og samstarfs háskóla og atvinnulífs, rís á svæði Vísindagarða Háskóla Íslands á næstu misserum. Stefanía G. Halldórsdóttir, framkvæmdastjóri CCP á Íslandi, Dagur B. Eggertsson borgarstjóri og Jón Atli Benediktsson, rektor Háskóla Íslands, tóku fyrstu skóflustunguna að nýbyggingunni í dag að viðstöddu fjölmenni.

Þegar hefur verið ákveðið að alþjóðlegi leikjaframleiðandinn CCP flytji skrifstofur sínar frá Grandagarði í nýbygginguna, sem verður að Bjargargötu 1 (áður Sturlugata 6), við hliðina á húsi Íslenskrar erfðagreiningar. Það er í samræmi við samkomulag sem fyrirtækið gerði við Vísindagarða Háskóla Íslands sumarið 2015. Með flutningunum skapast aukin tækifæri til samstarfs milli CCP og háskólasamfélagsins á sviði tækniþróunar, rannsókna og nýsköpunar.

Nýbyggingin verður alls 17.500 fermetrar að stærð á fjórum hæðum auk bílakjallara og er gert ráð fyrir að fleiri öflug fyrirtæki af ýmsum stærðum geti leigt rými þar og þróað áfram hugmyndir sínar. Á jarðhæð verður ýmiss konar þjónusta, verslanir og kaffihús auk ráðstefnusalar í hjarta byggingarinnar,  2. hæð skiptist í allmörg smærri rými, CCP verður á allri 3. hæð hússins og loks er gert ráð fyrir stórum rýmum á efstu hæð. Hönnun byggingarinnar miðast að því að auðvelt verði fyrir þá sem þar starfa að tala saman, tengjast og deila hugmyndum. Andrúm arkitektar og dkpitt arkitektar hönnuðu bygginguna. Lögð verður áhersla á umferð fótgangandi og hjólandi við þetta umhverfisvæna frumkvöðlasetur í hjarta Vatnsmýrarinnar.

Framkvæmdir við nýbygginguna hefjast á næstu dögum og samkvæmt verkáætlun er reiknað með að húsið verði fullbúið í lok árs 2018.

Nánari upplýsingar um húsið má finna á heimasíðu þess, www.groska.is

Í Grósku mun CCP koma sér fyrir til frambúðar og þar verða líka önnur þekkingar- og nýsköpunarfyrirtæki. Þar munu hugmyndir fæðast og fjölga sér ein af annarri. Þetta hús verður opið, þarna mun fjöldi fólks ekki bara starfa heldur eiga erindi af ýmsum ástæðum. Húsið sjálft er nýsköpun í sjálfu sér og á að verða stökkpallur fyrir frumkvöðla. Við sem stöndum að Grósku höfum oftar en einu sinni stofnað fyrirtæki og haslað okkur völl á nýjum markaði. Gróska er eitt ánægjulegasta verkefnið sem við höfum komið að því hér erum við að stofna heilt samfélag.

Þessi skóflustunga markar tímamót fyrir starfsemi CCP á Íslandi og þær áætlanir okkar að efla enn frekar samstarf okkar við háskólasamfélagið og skapandi greinar hérlendis. Samstarf sem ég er sannfærð um að muni ekki aðeins nýtast CCP því þær áskoranir sem við stöndum frammi fyrir í nýsköpun almennt kalla á þverfaglega nálgun og aukna áherslu á þekkingarmiðlun. Þekking skapar forskot og í Vísindagörðum skapast tækifæri til að leggja  saman krafta ólíkra aðila til rannsóknastarfa, miðlun upplýsinga og þekkingar.

– Stefanía G. Halldórsdóttir, framkvæmdastjóri CCP á Íslandi

Það er bæði fagnaðarefni að jafnöflugt fyrirtæki og CCP flytjist í Vatnsmýrina en ekki síður að til viðbótar eigi að reisa stærsta nýsköpunarsetur landsins, með rými fyrir fjölda smárra og stórra sprotafyrirtæki.  Það er sérstakt fagnaðarefni fyrir borgina að efla þekkingarstarfsemi og það mun Gróska sannarlega gera. Með flutningi CCP í Vatnsmýrina er gamall draumur að rætast. Þetta framsækna fyrirtæki verður jafnframt kjölfesta fyrir alls kyns sprota og nýsköpunarfyrirtæki sem fá nú bestu aðstæður til að þroskast og dafna. Gróska og efling Vísindagarða bætir samkeppnishæfni borgarinnar. Það sem skapar gott háskólaumhverfi og gott umhverfi fyrir ungt fólk er oftar en ekki það sama og skapar góða, kraftmikla og lífandi borg.

Á lóð Vísindagarða Háskóla Íslands er að verða til öflugur kjarni þekkingarfyrirtækja og við fögnum komu CCP og nýrra sprotafyrirtækja í þetta blómlega samfélag. Reynsla annarra þjóða sýnir að nábýli skapandi fyrirtækja, vísindamanna og stúdenta leiðir til aukins árangurs í verðmæta- og nýsköpun. Hér verður til suðupottur þekkingar og segull fyrir nýsköpunarstarfsemi. CCP kemur inn í umhverfi þar sem fyrir eru Íslensk erfðagreining og lyfjafyrirtækið Alvogen, auk glæsilegra stúdentagarða. Breiddin í starfsemi Háskóla Íslands, hin mikla fjölbreytni námsgreina og fagsviða og sterkar alþjóðlegar tengingar skapa ótal tækifæri til samvinnu um úrlausn verkefna þar sem saman kemur fólk með ólíkan bakgrunn og unnið er þvert á fræðigreinar. Við fögnum því sérstaklega að koma CCP á lóð Vísindagarða Háskóla Íslands skapar grundvöll til að hýsa í sömu byggingu ný sprotafyrirtæki.

– Jón Atli Benediktsson, rektor Háskóla Íslands.

Vísindagarðar Háskóla Íslands er félag sem er að stærstum hluta í eigu háskólans. Markmið félagsins er að skapa framúrskarandi umhverfi á lóð skólans fyrir rannsóknartengda og þekkingardrifna nýsköpun. Fyrirmyndin er sótt til nágrannalanda í austri og vestri, en útfærslan tekur mið af aðstæðum á Íslandi. Í samvinnu við fyrirtæki og stjórnvöld er ætlunin að fjölga störfum í þekkingarstarfsemi til heilla og hagsældar fyrir samfélagið.

Tölvuleikjaframleiðandinn CCP var stofnaður í Reykjavík árið 1997 og er í dag með skrifstofur í Reykjavík, Shanghai, Atlanta, London og Newcstle. Fyrirtækið framleiðir m.a. og gefur út tölvuleikinn margverðlaunaða EVE Online, sýndarveruleikaleikina EVE: Valkyrie og Gunjack fyrir PC og PlayStation 4 og gaf nýlega út framhaldsleikinn Gunjack II fyrir Daydream sýndarveruleikabúnað Google. Alls starfa rúmlega 330 manns fyrir fyrirtækið á heimsvísu, þar af rúmlega  tvö hundruð manns á skrifstofu þess í Reykjavík.