Hleðslustöðvar fyrir rafbíla í öll sveitarfélög landsins

Heimild:  

Orkusalan hefur ákveðið að gefa öllum sveitarfélögum á landinu hleðslustöð fyrir rafbíla.

Í tilkynningu frá fyrirtækinu segir að með framtakinu sé ætlun fyrirtækisins að auðvelda rafbílaeigendum að ferðast um landið en til þessa hefur það verið illmögulegt vegna fárra hleðslustöðva á landinu.

Fyrsta hleðslustöðin verður sett upp í Vestmannaeyjum á komandi vikum.

Í tilkynningu frá fyrirtækinu er haft eftir Hafliða Ingasyni, sölustjóra Orkusölunnar, að fyrirtækið sé með þessu vera að ýta mikilvægum bolta af stað, sýna samfélagslega ábyrgð og skila þannig sínu í innviði landsins.

„Við gerum þetta með virðingu fyrir náttúrunni að leiðarljósi en því meiri sem notkun á rafbílum er því minni er útblásturinn og er það auðvitað mjög gott mál. Þetta eru í kringum 80 stöðvar sem við gefum, verkefnið er komið í fullan gang og von er á stöðvunum til landsins á næstunni,“ segir Hafliði.