Drekka endurunnið og hreinsað piss til að komast af í geimnum

„Ef manni tekst að leiða hjá sér að maður sé í raun að drekka piss og einbeita sér að því að vökvanum sé safnað eftir uppgufun, þá er þetta ekki svo slæmt,“ segir Layne Carter hefur umsjón með vatnsbirgðum bandarísku geimfaranna.

93% af öllu vatni sem er um borð í geimstöðinni er endurunnið með þess móti. „Við getum endurunnið um það bil 6.000 lítra af vatni á geimstöðinni á hverju ári,“ segir geimfarinn Chris Hadfield í myndbandi sem sjá má hér að ofan. Þar má einnig sjá hvernig geimfararnir fara að því að geyma vatn í þyngdarleysi og nota það sparlega svo vatnsbirgðirnar klárist ekki.

Chris tekur fram að það sé engin ástæða til að hneykslast á þessu, því í raun sé vatnið sem geimfararnir drekka hreinna en vatnið sem flestir jarðarbúar drekka dagsdaglega.

Á fréttaveitu Bloomberg kemur fram að rússnesku og bandarísku geimfararnir hafi aldrei getað komið sér saman um hvernig rétt sé að sía vatnið og hvaða vökva eigi að endurnýta. Því nota þeir sitthvort vatnskerfið. Og Bandaríkjamennirnir láta sér ekki nægja að sía sitt eigið piss, heldur sía þeir rússneska pissið í þokkabót. Af þeim sökum tekst bandaríksu geimförunum að endurvinna talsvert meira vatn en rússnesku kollegum þeirra, en þetta kemur fram á vef Guardian.