Flugskýli Icelandair – Grábrók fyrst inn..(myndir)
Heimild: 
Nóvermber 2017
Grábrók, Boeing 757-200 þota Icelandair var fyrsta vélin sem var tekin inn í nýja flugskýlið. VF-mynd/pket. Smella á mynd til að stækka
370 starfsmenn vinna í flugskýli Icelandair á Keflavíkurflugvelli. Yfir 100 ný störf eftir stækkun skýlisins. Næst stærsta bygging á Suðurnesjum. Aðeins flugstöðin er stærri
Fyrsta Boeing 757-200 þota félagsins (Grábrók) var tekin inn í nýtt flugskýli Icelandair á Keflavíkurflugvelli í vikunni. Vélin var tekin inn í svokalla C skoðun, en það er stór öryggisskoðun sem framkvæmd er á um það bil tveggja ára fresti og tekur um það bil mánuð.
Í nýja skýlinu, sem er sambyggt eldra skýli, munu einkum fara fram slíkar stærri viðhaldsaðgerðir, þ.e. stórar skoðanir sem taka 2-6 vikur ásamt breytingum á flugvélum. Nýja flugskýlið er um 27 metra hátt stálgrindarhús á steyptum undirstöðum. Grunnflötur byggingarinnar er um 10.500 fermetrar og heildarflatarmál hennar um 13.600 fermetrar. Í byggingunni er stærsta haf í húsbyggingu á Íslandi en þakbitar milli burðarveggja spanna 95 metra. Með byggingu skýlisins þrefaldar Icelandair aðstöðu sína til framkvæmdar slíkra stórskoðana og getur því flutt flest þeirra til landsins en undanfarin ár hefur Icelandair í auknum mæli þurft að leita sér þessarar þjónustu erlendis vegna stækkandi flugflota.
„Eftir að ákvörðun var tekin um byggingu skýlisins hafa þegar orðið til 50-60 langtímastörf og má ætla að annað eins bætist við á næstu misserum og heildarviðbótin sé þannig yfir 100 störf. Um er að ræða einn umfangsmesta þekkingariðnað á Íslandi, en í dag starfa um 470 manns á tæknisviði Icelandair, þar af um 370 í húsnæðinu við Keflavíkurflugvöll. Stærsti hópurinn er flugvirkjar en einnig er að finna þar á annað hundrað háskólamenntaðra starfsmanna,“ segir Guðjón Arngrímsson, blaðafulltrúi Icelandair.
Guðjón segir að flugskýlið sé byggt til að svara vexti Icelandair undanfarin ár og til framtíðar, en greitt aðgengi að viðhaldsþjónustu eykur öryggi og hagkvæmni með því að byggja upp þekkingu á flugvélum innan fyrirtækisins. Slíkt gerir Icelandair einnig kleift að skapa sér sérstöðu með nýjungum í farþegarými og annarri tækni, en mun sveigjanlegra er að vinna slík verkefni með eigin aðstöðu.
Flugskýlið er næst stærsta bygging á Suðurnesjum og líklega landsins. Hér sést yfir stóra hluta nýju byggingarinnar
Hér er Grábrók á leið inn í skýlið, fyrst véla Icelandair
Um 20 sm. pláss er í kringum vélina að vinnupöllunum. Það er verið að tala um sérhannað flugskýli. Hér er hún komin inn í hólfið sitt en sérhannaðir vinnupallar umkringja hana
Hitapanelar í loftum hita skýlið, froðublásarar í loftum verja skýlið gegn bruna. Mynd tekin í fjærhorni skýlisins. Boeing vélin virkar ekkert mjög stór þaðan.
