Orku og vatnsinnviðir – Mikilvæg skotmörk

Grein/Linkur: Ráðist á orku- og vatnsinnviði

Höfundur: Ásgeir Ingvarsson

Heimild: 

.

Mynd google.com/maps 9.10.2026

.

Júlí 2026

Ráðist á orku- og vatnsinnviði

Vatnshreinsistöð í Kúveit löskuð eftir flugskeyti. Bandaríkjaher sprengdi upp íranskt kjarnorkuver í smíðum. Ólíklegt að þar hafi verið geislavirk efni. IAEA varar við árásum á kjarnorkumannvirki

Bandaríkjaher greindi frá því í gær að bandarískur hermaður hefði látið lífið þegar reynt var að eyða sprengiefni úr írönskum dróna sem skotinn hafði verið niður í norðurhluta Íraks.

Þá fórust tveir bandarískir hermenn á föstudag þegar íranskar sprengjur hæfðu skotmörk í Jórdaníu en því til viðbótar fundust á sama stað líkamsleifar sem ekki er enn búið að bera kennsl á.

Með þessum dauðsföllum hafa samtals sautján manns úr herliði Bandaríkjanna látið lífið síðan Íransstríðið hófst 28. febrúar.

Ekkert lát var á átökum á Persaflóasvæðinu um helgina. Á sunnudag beindi Íran flugskeytum í átt að Jórdaníu og Ísrael og sögðust herir landanna hafa skotið flugskeytin niður yfir hafnarborgunum Eilat og Aqaba fyrir botni Aqaba-sunds.

Þá hæfðu Íranir vatnshreinsistöð í Kúveit svo að þar blossaði upp eldur og Barein sagði Íran einnig hafa reynt að ráðast á borgaralega innviði. Þrjá daga í röð hefur Íran gert árásir á orku- og vatnsveitumannvirki í Kúveit og á laugardag hæfðu íranskar flaugar kúveiska olíuvinnslustöð.

Vörpuðu sprengjum á kjarnorkuver í smíðum

Íran kvaðst hafa aftrað för fjögurra skipa sem freistuðu þess að sigla í gegnum Hormússund um helgina. Má ráða af lýsingu Íranshers að tvö skipanna hafi verið skemmd í aðgerð hersins svo að þau urðu vélarvana en hin tvö gátu snúið við.

Bandaríkin létu sprengjum rigna yfir Íran um helgina og sögðu árásunum m.a. ætlað að hefna fyrir hermennina tvo sem féllu í árás föstudagsins. Tókst Bandaríkjaher m.a. að hæfa íranskt kjarnorkuver sem var í smíðum en Alþjóðakjarnorkumálastofnunin (IAEA) sagði að engin geislavirk efni hafi verið á framkvæmdasvæðinu þegar það var síðast skoðað af stofnuninni.

Rafael Grossi, stjórnandi IAEA, brýndi fyrir stríðandi fylkingum að sýna ýtrustu aðgát á svæðum þar sem kjarnorkutengd starfsemi fer fram.