Skolsalerni – Feimnismál, þægilegra, sparnaður

Grein/Linkur: Karlmenn feimnari við skolun afturendans

Höfundur: Morgunblaðið

Heimild: 

.

.

Júlí 2026

Karlmenn feimnari við skolun afturendans

Sala á skolsalernum hefur tekið kipp eftir að framleiðendur settu á markað slík klósett á hóflegra verði en áður, að sögn framkvæmdastjóra Tengis.

Skolsalernin eru feimnismál í hugum sumra og segir Arnar Árnason, framkvæmdastjóri fyrirtækisins, kynjamun á afstöðu gagnvart klósettunum og að eldra fólk sé frekar kaupendur en hinir yngri.

„Við erum búin að selja merkilega mikið af þessu, sérstaklega þar sem við höfum nær ekkert auglýst þetta,“ segir Arnar.

Hann segir hægt að kaupa þetta í ýmsum verðflokkum. Skolklósett sé ekki það sama og skolklósett.

Arnar Árnason, framkvæmdstjóri Tengis segir vinsældir skolsalerna á uppleið. Samsett mynd/Aðsend

Forritað klósett 

Þannig er ódýrasta útgáfan eingöngu með skoli en fídusarnir eru þó mun fleiri ef fólk vill njóta allra kostanna í botn.

„Við bjóðum líka mikinn lúxus, þar sem þú ert með skol, þurrk, hita í setu, sjálfvirka opnun, LED-lýsingu, lyktareyðingu og forritun þar sem salernið skilur þarfir hvers og eins notanda, hvað varðar hitastig á bununni og kraftinn í henni. En svo erum við einnig með klósett sem eru bara með skol, en hægt er að stilla hitastig og kraft,“ segir Arnar.

Dreifður hópur 

Hann segir tiltölulega nýlegt að fyrirtæki hafi framleitt slík klósett sem séu á færi hins almenna notanda að kaupa. Hins vegar kostar dýrasta týpan norðan við milljón krónur.

„Við höfum selt þetta á mjög dreifðan hóp einstaklinga. Frekar eldra fólk en yngra, en samt dreifðan hóp,“ segir Arnar.

Sparnaðarráð 

Sjálfur á Arnar skolklósett og telur kosti þess ótvíræða. „Þú þarft ekkert að nota skolið ef þú vilt það ekki, en ef þú gerir það ertu að spara klósettpappírskostnað, annaðhvort með þurrki ef klósettið býr yfir þeim kosti, eða með einni umferð af pappír til að þurrka,“ segir Arnar.

Hann segir að nokkuð hafi verið selt inn á hjúkrunarheimili og meðferðarkjarna og að kostirnir geti verið nokkrir fyrir þá starfsemi.

Karlmenn feimnari við að nota bununa 

Spurður segir Arnar að sumir séu feimnir við slík salerni.

„Þetta á sérstaklega við um karlmenn. Þeir eru feimnir við að nota þetta í fyrsta sinn. En síðan, þegar þú ert kominn upp á lagið með þetta, þá bíður þú eftir því að komast heim til að gera númer tvö. Þetta er svo margfalt þægilegra,“ segir Arnar, sem bætir því við að hann hafi verið með slík klósett á sínu heimili undanfarin tvö ár.

„Ég tala því af reynslu og sannfæringu,“ segir Arnar kíminn.