Burður – Mannvirkjarannsóknir, prófanir

„Almenningur hefur kallað eftir öflugri byggingarannsóknum og prófunum hér á landi og stofnun Burðar er svarið við því. Markmiðið er skýrt: Að Burður leiði til betri bygginga. Bygginga sem eru vandaðar, rannsakaðar og prófaðar – og þar sem þekking ræður för en ekki tilviljun,“ segir Inga Sæland, félags- og húsnæðismálaráðherra. „Rakaskemmdir verða teknar föstum tökum og strax í byrjun næsta árs munum við taka í notkun faggildan gluggaprófunarbúnað. Það þýðir að hægt verður að prófa og votta byggingarvörur sem framleiddar eru hér á landi og styðja þannig við innlenda framleiðendur.“

Burður á rætur sínar að rekja til viðbragða stjórnvalda við ákalli fjölmargra aðila um aukið fjármagn og skýrara skipulag á rannsóknarumhverfi mannvirkjageirans. Á viðburðinum voru jafnframt kynnt ritin Rannsóknaþörf í húsnæðis- og mannvirkjarannsóknum á Íslandi og Vegvísir að mótun rannsóknaumhverfis: Uppgjöf aðgerða og nýr farvegur. Útgefið efni tengt Burði er nú aðgengilegt á vef HMS.

„Það er mjög ánægjulegt að rannsóknaumhverfið í mannvirkjagerða sé komið á dagskrá en það hefur vantað stefnu í þessum málaflokki. Þetta er einn mikilvægasti málaflokkur í nútíma samfélagi; hvernig við byggjum húsakynni og umhverfi og nátengt því hvernig samfélag við viljum byggja. Burður byggir á þverfaglegri samvinnu milli rannsókna og nýsköpunar og þar er von mín að samnýting á styrkleikum allra aðila, – rannsakenda, búnaðar, gagnaöflunar, fjármögnunar og miðlunar muni auka slagkraft og samfellu frá rannsóknum til innleiðingar og skila öruggari, hagkvæmari og sjálfbærari mannvirkjum,“ segir Logi Einarsson, menningar-, nýsköpunar- og háskólaráðherra.

Logi Einarsson, menningar-, nýsköpunar- og háskólaráðherra, ávarpar samkomuna.

Hluti af stærra ferli sem ætlað er að auka skilvirkni, samræmingu og gæði

Myndaður verður stýrihópur með fulltrúum stjórnvalda, atvinnulífs og menntastofnana sem mun fylgja eftir og styðja við starf starfsamstarfsvettvangsins. Rekstraraðili Burðar verður HMS en hlutverk stofnunarinnar felst í að tryggja virkt samstarf og uppbyggingu samstarfsvettvangsins.

„Burður er hluti af stærra ferli sem þegar er hafið við mótun starfsumhverfis íslenskrar mannvirkjagerðar til framtíðar, sem ætlað er að auka skilvirkni, samræmingu, gæði, sjálfbærni og neytendavernd í mannvirkjagerð. Þannig vinnum við samhliða þessu m.a. að breyttu byggingareftirliti og að koma umsóknum um byggingarleyfi á einn stað. Burður verður án efa einn af máttarstólpum HMS en við erum þegar byrjuð að efla okkar teymi í samræmi við það,“ segir Hermann Jónasson, forstjóri HMS.

Upplýsingar um Burð, hlutverk hans og áherslur má nálgast á vef HMS, hms.is/burdur