Olíuleit Íslandi, sagan 2025 – Rannsóknir, ávinningur

Grein/Linkur: Renna hýru auga til frekari olíuleitar á Drekasvæði

Höfundur: Grétar Þór Sigurðsson RÚV

Heimild: 

.

Hluti Drekasvæðisins er norðaustast í efnahagslögsögu Íslands. RÚV

.

Mars 2025

Renna hýru auga til frekari olíuleitar á Drekasvæði

Bæjarráð Fjarðabyggðar segir áframhaldandi rannsóknir á olíulindum á Drekasvæðinu geta skilað miklum efnahagslegum ávinningi fyrir landið allt. Mikilvægt sé að kanna hagkvæmni olíuleitar vegna þess að orkuskipti hafi gengið hægt.

Bæjarráð Fjarðabyggðar beinir til stjórnvalda að meta að nýju hagkvæmni olíuleitar á Drekasvæðinu. Það vill bæjarráðið að verði gert vegna þess að orkuskipti ganga hægar en gert hafði verið ráð fyrir.

„Breytt heimsmynd kallar á endurskoðun fyrri ákvarðana með tilliti til orku- og þjóðaröryggis. Birtist þetta ekki síst í því meðal annars að Noregur er að auka olíu- og gasvinnslu og horfa til nýrra vinnslusvæða,“ segir í samþykkt bæjarráðs.

Þar segir að áframhaldandi rannsóknir gætu skilað miklum efnahagslegum ávinningi, bæði fyrir Austurland sem og landið allt. Það sé mikilvægt skref í að tryggja orkuöryggi landsins til framtíðar meðan lokið verði við orkuskipti, meðal annars með rafeldsneyti.

Fulltrúi minnihlutans sat hjá við afgreiðsluna

Fulltrúi Fjarðalistans í bæjarráði, Stefán Þór Eysteinsson, sat hjá við afgreiðslu tillögunnar um endurmat olíuleitar á Drekasvæðinu. Í bókun hans segir: „Mikilvægt er að Ísland tryggi orkuöryggi til framtíðar með stefnumótun sem tekur mið af sjálfbærum lausnum, orkuskiptum og langtímahagsmunum samfélagsins.“

Orkustofnun veitti fyrstu leyfin til rannsókna og vinnslu olíu á Drekasvæðinu undir lok árs 2012. Þau voru formlega undirrituð í byrjun árs 2013. Leyfunum var ýmist skilað eða þau afturkölluð. Það síðasta var afturkallað af Orkustofnun 2018.