Neyðarhitaveita – Tryggja aðgengi

Grein/Linkur: Mikilvægt að tryggja aðgengi að lágmarksbúnaði til neyðarhitaveitu strax

Höfundur: Orkustofnun

Heimild:

.

.

Nóvember 2023

Mikilvægt að tryggja aðgengi að lágmarksbúnaði til neyðarhitaveitu strax

Almannavarnir og Orkustofnun unnu í sameiningu tillögur að aðgerðum í þágu húshitunar á Reykjanesi á neyðartímum og voru þær lagðar fyrir ríkisstjórn um helgina. Aðgerðirnar eru hugsaðar sem neyðarviðbrögð komi til þess að Svartsengisvirkjun verði óstarfhæf vegna jarðhræringa og eru unnar í ljósi þeirrar stöðu sem nú er uppi í samráði við HS Orku og HS Veitur með aðkomu Verkís. Í tillögum að aðgerðum er horft til styrkveitinga til heimila sem þau gætu sótt og nýtt til kaupa á búnaði til húshitunar og svo innkaup og leigu á búnaði fyrir neyðarhitaveitu sem nýst gæti til að kynda húsnæði.

Þá er horft til tímabundinnar aukningar á eldsneytisnotkun sem þyrfti til að knýja neyðarbúnaðinn, kostnaði sem það myndi hafa í för með sér og hvernig megi tryggja að nægar eldsneytisbirgðir séu til í landinu.

Ítrekað er í tillögunum að mikilvægt sé að tryggja aðgengi að lágmarksbúnaði strax til að geta tryggt húshitun á svæðinu tímabundið í neyð á meðan unnið yrði að varanlegri og umhverfisvænni lausnum með jarðhita. Áfram er unnið með tillögurnar á vettvangi ráðuneytis orkumála og ljóst að símat á aðstæðum skiptir máli fyrir útfærslu þeirra.