Eldvarnir – Ábyrgð húsnæðisfélaga

Grein/Linkur:  Húsnæðisfélög ábyrg í eldvörnum

Höfundur: Garðar H. Guðjónsson

Heimild:

.

Ágúst 2015

Húsnæðisfélög ábyrg í eldvörnum

Garðar H. Guðjónsson

Í ljósi þess að rannsóknir hafa sýnt að eldvörnum virðist einkum vera áfátt hjá fólki sem býr í leiguhúsnæði grennslaðist Eldvarnabandalagið fyrir um hvernig staðið er að eldvörnum hjá nokkrum stórum leigu- og húsnæðisfélögum. Haft var samband við sex félög sem leigja út og annast rekstur á um 6.000 íbúðum víða um land. Óhætt er að segja að niðurstaðan hafi komið einkar ánægjulega á óvart. Í ljós kom að félögin standa almennt vel að eldvörnum í íbúðum sínum og sum alveg framúrskarandi vel. Það er því ljóst að það eru ekki leigjendur þessara félaga sem koma illa út í rannsóknum á eldvörnum á íslenskum heimilum.

Þar sem best lætur sjá umrædd félög til þess að reykskynjarar eru í öllum aðskildum rýmum, slökkvitæki við helstu flóttaleið og eldvarnateppi á aðgengilegum stað í eldhúsi. Nokkur dæmi eru um að skynjararnir séu tengdir kerfum öryggisfyrirtækja. Sum félög senda leigjendum sínum árlega áminningu um mikilvægi eldvarna og þess að halda búnaðinum við, svo sem með því að skipta um rafhlöður í reykskynjurum. Jafnvel eru dæmi um að félögin láti leigjendum rafhlöður í té og í að minnsta kosti einu tilviki býðst félag til að aðstoða við rafhlöðuskipti ef þess gerist þörf. Dæmi eru um að stór húsnæðisfélög leiti ráðgjafar slökkviliðs um eldvarnir, ekki síst eldvarnir í sameign fjölbýlishúsa.

Handbók um eldvarnir

Dæmi eru einnig um að félög hafi sent leigjendum gagnlegar upplýsingar um eldvarnir. Þannig sendi Klettur leigufélag til að mynda öllum leigjendum sínum handbók Eldvarnabandalagsins um eldvarnir síðastliðið vor ásamt sameiginlegu bréfi Kletts og Eldvarnabandalagsins um mikilvægi eldvarna og viðhalds eldvarnabúnaðar. Handbókin er einnig aðgengileg á heimasíðu félagsins. Fleiri stór húsnæðisfélög hyggjast fara að dæmi Kletts nú með haustinu.

Það er sannarlega fagnaðarefni að þessi stóru húsnæðis- og leigufélög skuli standa með svo ábyrgum hætti að eldvörnum. Vonandi taka aðrir leigusalar þau sér til fyrirmyndar.

Eldvarnir og aðgát

Engu að síður er ljóst að eldvörnum er mjög ábótavant á mörgum íslenskum heimilum og ástæða til að hvetja fólk til að tryggja viðunandi eldvarnir í íbúðum sínum. Þær eru í aðalatriðum þessar:

1. Reykskynjarar, tveir eða fleiri. Best er að hafa reykskynjara í öllum aðskildum rýmum en að lágmarki framan við eða í hverri svefnálmu og á hverri hæð.

2. Léttvatns- eða duftslökkvitæki við helstu flóttaleið.

3. Eldvarnateppi á aðgengilegum stað í eldhúsi, þó ekki svo nærri eldavél að erfitt sé að ná til þess komi upp eldur.

Umfram allt þarf svo auðvitað að fara varlega. Samkvæmt upplýsingum Mannvirkjastofnunar er opinn eldur, það er kertaljós og reykingar, helsta orsök eldsvoða þar sem banaslys hafa orðið síðan 2001. Rafmagn er einnig algeng orsök eldsvoða, ekki síst vegna notkunar eldavéla, þvottavéla og þurrkara. Því ber að sýna aðgát við eldamennsku og alls ekki hafa þvottavélar og þurrkara í gangi þegar heimilið er mannlaust.