Sjóvarmastöð Vestmannaeyja – 10,4 MW
Heimild: 
Nóvember 2018
Tvær vélar af fjórum voru í keyrslu í Eyjum í gær. Ljósmynd/Ívar Atlason
„Við erum með fjórar vélar og erum að keyra tvær þeirra á fullum afköstum núna. Þær framleiða eins og þær eiga að gera, skila um fimm megavöttum. Þegar við verðum komin með alla sjódælingu í botn munum við nota í kringum 550 lítra á sekúndu.“
Þetta segir Ívar Atlason, svæðisstjóri vatnssviðs HS Veitna í Vestmannaeyjum, í Morgunblaðinu í dag.
Unnið er að gangsetningu næststærstu sjóvarmadælustöðvar í heimi í Vestmannaeyjum. Hún er 10,4 megavött. Þar verður 6-11 gráða heitur sjór notaður sem varmagjafi stöðvarinnar til húshitunar í Eyjum. Búist er við því að dælustöðin verði komin í fulla notkun í næstu viku, að því er fram kemur í blaðinu.
Janúar 2018
Það hefur ekki farið framhjá íbúum Vestmannaeyja þær framkvæmdir sem nú standa yfir vegna varmadæluverkefnisins sem nú er unnið að. Verið er að leggja lagnir frá kyndistöðinni niður á Hlíðarveg þar sem dælustöðin verður.
Á heimasíðu HS-veitna er að finna nánari upplýsingar um verkenfnið. Þar segir:
Enginn jarðhiti er í Vestmannaeyjum. Töluverð fyrirhöfn og kostnaður hefur ætíð verið við upphitun húsa í Vestmannaeyjum. Eyjamenn hafa lengi verið opnir fyrir hugmyndum til að auðvelda upphitun húsa og til að draga úr kostnaði. Hús voru aðallega hituð upp með kolum. Eftir seinna stríð tók olíukynding við upphituninni. 1962 var rafstrengur lagður til Eyja og tók því rafkynding við upphituninni.
23. janúar 1973 hófst eldgos í byggð í Vestmannaeyjum. Ákveðið að virkja hitann úr hrauninu til upphitunar á húsum. Tvöfalt dreifikerfi var lagt í allan bæinn og dælustöð byggð. Fyrsta og eina hraunhitaveitan sem starfrækt hefur verið í heiminum svo vitað sé. Með lagningu dreifikerfis um bæinn skapaðist möguleiki að nota fleiri aðferðir við upphitun á hitaveituvatninu.
Árið 1988 var hitinn í hrauninu það lítill, að rekstri hraunhitaveitunnar var hætt og 20 MW rafskautaketill tekinn í notkun, sem hefur séð um upphitun á hitaveituvatninu síðan. Olíukatlar notaðir sem varaafl. Sorpbrennsla var hér í rekstri frá 1993-2013 og varmi frá henni notaður til upphitunar. Varmi frá fiskimjölsverksmiðjunum er einnig notaður til upphitunar.
Varmadæla flytur orku (varmaorku) frá einum stað til annars. Það eru varmadælur inn á hverju heimili þar sem ísskápur eða frystikista er til staðar. Kælimiðill sem gengur í lokaðri hringrás frá vermi til varmaskiptis, flytur varmaorkuna. Algengasta gerðin er Ammoníak ( NH3 ).
Með því að dæla miklu magni af sjó, er hægt að fá næga varmaorku fyrir sjóvarmadælu. Aflstuðull fyrir sjóvarmadælu (COP stuðull) er um 3, þ.e.a.s. ef varmadælan notar 1 kW af raforku, þá framleiðir sjóvarmadælan 3 kW af varmaorku.
Sjóvarmadælustöðin verður reist við Hlíðarveg 4. Leggja þarf hitaveitulagnir og háspennustreng milli kyndistöðvar og sjóvarmadælustöðvar. Leggja þarf affallsrör fyrir sjóinn frá sjóvarmadælustöð og út fyrir Eiði. Ef allar áætlanir standast, þá verður sjóvarmadælustöðin tekin í notkun á vormánuðum 2018. Um er að ræða næst stærstu sjóvarmadælustöð í heimi og er áætlaður kostnaður við verkefnið um 1400 milljónir.
Varmadælurnar verða alls fjórar (2,6 MW hver) og eru smíðaðar af Sabro í Danmörku.
