Á að rukka fyrir notkun salerna í Hörpu?

Heimild:  

Október 2017

Hætt að rukka fyrir notkun salerna í Hörpu

Stjórn Hörpu lét af gjaldtöku á salernisaðstöðu hússins í september þar sem ferðamönnum er tekið að fækka með haustinu. „Núna þegar hlutirnir hafa snúist við og allt öðruvísi nýting er á húsinu þá borgar þetta sig ekki núna þegar langstærsti hlutinn eru gestir viðburða í húsinu,“ segir Diljá Ámundadóttir verkefnisstjóri ferðamála í Hörpu í samtali við Vísi.

Aukinn straumur ferðamanna í húsið hafi orðið til þess að gera þurfti ákveðnar áherslubreytingar yfir sumartímann. Diljá segir að fólk hafi almennt brugðist vel við gjaldtökunni en ásteytingarsteinninn hafi verið sjálf upphæðin. MBL greindi fyrst frá því að gjaldtökunni hefði nú verið hætt.

Vísir greindi frá því í byrjun sumars að stjórnendur Hörpu hefðu gripið til þess ráðs að rukka fyrir aðgengi að salernum hússins. Gjaldtakan hefur aldrei átt við um gesti Hörpu heldur aðeins þá sem lögðu leið sína í tónlistar-og ráðstefnuhúsið í þeim eina tilgangi að notast við salernisaðstöðuna.

Diljá segir að ákvörðunin um að hefja gjaldtöku hafi verið ákveðið viðbragð til að stýra þeim fjölda ferðamanna sem lagði leið sína í Hörpu gagngert til þess að nota salernið. Hún segir að rútubílstjórar hefðu oft notað menningarhúsið sem salernisstopp fyrir ferðamenn.

Tónleika- og ráðstefnuhúsið Harpa.VÍSIR/EYÞÓR

Ferðamenn lögðu sig á gólfinu og smurðu sér nesti
Aukinn fjöldi ferðamanna sem heimsótti Hörpu kallaði á áherslubreytingar að sögn Diljár.

„Þetta er bara sumaráhersla sem við gerðum. Hluti af því er að bregðast við hvernig umgengni í öllu húsinu var. Fólk var að smyrja sér nesti og leggja sig á gólfinu og þar af leiðandi stýrðum við aðgengi um húsið. Þetta voru áherslubreytingar til þess að halda betur utan um hvernig Harpa tekur á móti fólki,“ segir Diljá sem greindi frá því að sumir ferðamannanna hefðu gengið svo langt að nota handklæðin sem teppi.

Aðspurð segir Diljá að fólk hafi almennt brugðist vel við gjaldtökunni. „Þetta er líka bara víðs vegar um heiminn í sambærilegum stofnunum, óperuhúsum og menningarstofnunum. Það eru náttúrulega alltaf einhverjar neikvæðar raddir en það voru yfirleitt Íslendingar sem voru öðru vanir og sem hafa sterkar tilfinningar til hússins. En þetta gekk alveg rosalega vel, þetta gekk upp og við erum mjög ánægð með útkomuna.“

Fólk hafði sterkar skoðanir á upphæðinni
Þú bendir réttilega á að slík gjaldtaka tíðkist víða um heim en var gjaldið ekki of hátt? „Viðbrögðin voru yfirleitt þau að fólk skildi þetta ofboðslega vel en það var kannski þessi upphæð sem fór mismunandi í fólk og fólk hafði sterkar skoðanir á því. Það má rökræða það en þetta gekk svo sem alveg upp og þá verður það við að sitja.“

Harpa fari í sumarham á nýju ári
Aðspurð hvort þau hyggist taka aftur upp gjaldtökuna að ári segir Diljá: „Ég þori kannski ekki alveg að fara með gjaldtökuna. Það verður vegið og metið hvernig þetta verður útfært en við höfum alveg tekið ákvörðun um að það verði svokallaður „sumarhamur“ í Hörpu þar sem áherslan er lögð á þennan straum ferðamanna sem kemur í hús til þess að geta stýrt því sem best og að allir geti notið sem best.“

Diljá er ekki með nákvæma tölu yfir þá fjárhæð sem hlaust af gjaldtökunni en staðfestir að hún hafi staðið undir sér og þar af leiðandi séu þau sátt. Gjaldtakan hafi verið hluti af þessum áherslubreytingum sem áttu sér stað í byrjun sumars sem miði að bættri umgengni og betri upplifun gesta.

Júní 2017

Harpa rukkar fyrir klósettferðir gesta

Stjórnendur Hörpu hafa gripið til þess ráðs að rukka fyrir aðgengi að salernum staðarins. Taka upp klósettgjald og mun nú kosta 300 krónur að nota salerni hússins.

„Loksins gerum við það og förum eftir sama fyrirkomulagi aðrar menningarstofnanir í heiminum,“ segir Diljá Ámundadóttir upplýsingafulltrúi Hörpu.

Aukinn straumur ferðamanna í Hörpu, yfir sumartímann, varð til þess að stjórnendur Hörpu brugðu á það ráð að hefja gjaldtöku á salernum hússins. VÍSIR/SAMSETT MYND

Erfitt að halda úti fríu almenningsklósetti í Hörpu
Klósettgjaldið er tekið upp í samhengi við það að Harpa fer nú í sumarbúning og er þetta kynnt sem liður í aukinni þjónustu við ferðamenn. Gert er ráð fyrir 3000 gestum í húsið daglega og Diljá segir að bregðast verði við auknum ferðamannastraumi; 20 prósenta aukningu ferðamanna í Reykjavík frá því í fyrra.

„Við verum að halda þessum velhönnuðu klósettum snyrtilegum og í samræmi við annað í húsinu. Kannski erfitt að halda úti fríu almenningsklósetti í húsi sem hefur fengið arkítektaverðlaun.“

Liður í að stýra umgangi og góðri umgengni
Diljá segir að það sem kemur inn við það að rukka fyrir salernisferðir gesta muni tæplega vera mikið uppí þann fjárhagshalla sem húsið standi frammi fyrir. En það muni mæta kostnaði við að halda salernunum í lagi. Þetta sé löngu tímabær aðgerð og liður í að stýra aðgengi um húsið.

„300 krónur er nákvæmlega sama gjald og tekið er fyrir afnot af almenningssalerni sem er við hliðina á Ölstofunni. En, þetta er náttúrlega miklu snyrtilegra salerni. Það var ákall eftir þessu. Margir hafa spurt hvenær við ætlum að fara að stýra þessu aðeins betur,“ segir Diljá.

Ferðamenn breiða úr sér í húsinu
Hún segir brögð að því að ferðamenn hafi komið gagngert í Hörpu til að nota salerni hússins. „Já, það er alltof mikið af því. Heilu hóparnir sem komu gagngert til að nota klósettið.“ Slíkt sæmir ekki þegar virðuleg menntastofnun er annars vegar. „Þetta er svo við getum betur haldið yfirbragði og glæsileika hússins í góðu horfi. Það er leiðinlegt en ferðamenn hafa verið að breiða úr sér hér, jafnvel leggja sig hér og smyrja sér samlokur. Það er enginn að fíla það nema þeir akkúrat þegar þeir eru að því,“ segir Diljá.

Þessar breytingar taka gildi þann 19. júní og standa yfir til 26. ágúst. Diljá segir rétt að Íslendingar eigi því ekki að venjast að vera rukkaðir sérstaklega fyrir klósettferðir sínar.

„En við verðum að bregðast við þessu óhrædd með skynsemi. Þetta þekkist víðast hvar annars staðar.“