Skútuvogur – 10.000 fermetra atvinnuhúsnæði
Heimild: 
Mars 2017
Fasteignafélagið Reitir ætlar að byggja tíu þúsund fermetra atvinnuhúsnæði í Skútuvogi sem á að hýsa verslun, iðnað eða vörugeymslur. Reitir hafa auglýst eftir leigutökum stefnt er að því að semja við tvo eða fleiri um starfsemi í húsinu.
Í auglýsingu á vefsíðu Reita kemur fram að horft sé til þess að hanna og þróa húsið í samstarfi við væntanlegan leigutaka sem mun þannig gefast kostur á því að fá sérhannað húsnæði utan um starfsemina.
Samkvæmt gildandi deiliskipulagi er heimilt að byggja 8.200 fermetra að grunnfleti og 11.200 fermetra með milligólfum.
Í auglýsingu segir að fyrst og fremst sé horft til þess að á lóðinni rísi nútímalegt vöruhús enda sé staðsetning lóðar afar góð með tilliti til vörudreifingar. Önnur starfsemi komi einnig til greina en í aðalskipulagi Reykjavíkur er gert ráð fyrir rýmisfrekri verslun, heildsölu, þjónustu og léttum iðnaði. Stutt er í hafnarsvæði bæði hjá Eimskip og Samskip en einnig er lóðin vel staðsett með tilliti til nýs íbúðarhverfis, Vogabyggðar.
