Lúxushótel byggt þar sem áður var sláturhús og kannabisræktun

Heimild:  

Til stendur að byggja lúxushótel á bökkum Hvítár í Laugarási á næstu árum. Á landinu er nú gamalt sláturhús í mikilli niðurníðslu, en húsið var meðal annars notað til umfangsmikillar kannabisræktunar fyrir nokkrum árum.

Mynd Mats Wibe Lund

Í húsinu var starfrækt sláturhús á árunum 1964- 1988. Þar vann og bjó fjöldi fólks á þeim tíma.

„Það var líf og fjör. Maður hefur heyrt allskonar sögur af slátraraböllum og gleðskap, án þess að ég ætli að fara eitthvað nánar út í það. Það var mikil rómantík og mikið líf. Fólk náttúrlega hittist hérna, starfaði og borðaði saman, svo það var mikið líf,“ segir Helgi Kjartansson oddviti Bláskógabyggðar.

Eftir að sláturhúsið lokaði stóð húsið autt í um tíu ár. Þá keyptu það hjón og hófu þar rekstur gistiheimilis.

Fyrrum kannabisverksmiðja
Gistiheimilisreksturinn gekk þó ekki betur en svo að eftir nokkurra ára starfsemi gerði lögregla húsleit í gamla sláturhúsinu. Þar með komst upp um umfangsmikla kannabisræktun eigandans. Hann var ákærður og dæmdur fyrir að hafa á tímabilinu ágúst 2005 til desember sama ár ræktað þar 163 kannabisplöntur og stolið rafmagni til ræktunarinnar.

Eftir að upp komst um ræktunina fór að halla undan fæti í gistiheimilisrekstrinum. Byggðastofnun eignaðist landið en undanfarin ár hefur húsið verið í algjörri niðurníðslu. Það er raunar engu líkara en að eigandinn hafi skroppið af bæ og aldrei komið aftur.

„Þetta hús er bara ónýtt núna og ekkert hægt að púkka upp á það eins og maður segir,“ segir Helgi um ástand hússins.

En það stendur til bóta. Nú hafa fjárfestar keypt landið og til stendur að á svæðinu rísi lúxushótel. Uppbyggingin var samþykkt í aðalskipulagi nýlega og deiliskipulag er langt á veg komið.

„Þetta hús verður bara rifið og hótelið verður hér. Það er auðvitað glæsilegt útsýni hér yfir sveitirnar hér í kring, það er Vörðufell, Ingólfsfjall, Búrfell og Mosfell, og Hvítáin rennur hérna fram hjá. Þetta myndi efla og styrkja samfélagið hérna hjá okkur, það er ekki spurning. Og fjölga í sveitarfélaginu. Þetta verður innspýting inn í samfélagið hér í Laugarási og bara allri sveitinni.“

Endurnýjun lífdaga
Helgi gerir ráð fyrir að framkvæmdir við uppbyggingu hótelsins verði komnar á fullt árið 2018.

„Hér náttúrlega var mikið líf, þó það hafi kannski verið stutt hjá fénu sem hérna kom í slátrun. En hérna verður líf og aftur starfsemi og eitthvað um að vera. Það er það sem við viljum.“

Það bendir því allt til þess að svæðið sem eitt sinn iðaði af lífi, fór svo í eyði, varð gistiheimili og  síðar kannabisverksmiðja, gangi á næstu árum í endurnýjun lífdaga.