HS Orka hreinsar brennisteinsvetni

Hs Orka hf. hefur skrifað undir samstarfssamning við danska hátæknifyrirtækið Haldor Topsøe um byggingu tilraunastöðvar til að hreinsa brennisteinsvetni (H2S) úr gasstraumi sem fellur til við nýtingu jarðvarma í Svartsengi. Þetta kemur fram í tilkynningu félagsins í dag.

Tilraunastöðin, sem verður sú fyrsta sinnar tegundar, byggir á nýrri tækni danska fyrirtækisins en aðferðin felur í sér hvatað efnahvarf. Um er að ræða umhverfisvænni lausn til þess að fjarlæga brennisteinsvetni úr gasstraumi jarðvarmavera, minnka lykt og samhliða framleiða hreinan koltvísýring (CO2).

Við nýtingu á jarðvarma fellur til nokkuð magn jarðhitagastegunda, s.s. koltvísýringur og brennisteinsvetni. Koltvísýringurinn er verðmæt afurð í ýmiskonar iðnað og framleiðslu. Aðferð Haldor Topsøe fjarlægir brennisteinsvetni úr gasinu svo eftir stendur hreinn koltvísýringsstraumur. Brennisteinsvetninu verður dælt aftur niður í jörðina í uppleystu formi. Tilraunastöðin mun hreinsa hluta af þeim gasstraumi sem fellur til við nýtinguna. Stefnt er að því að hefja rekstur tilraunastöðvarinnar snemma árs 2017.