Vaðalaheiðargöng – Gröftur ekki gengið betur í eitt og hálft ár

Heitt vatn hefur verið til vandræða Eyjafjarðarmegin en samkvæmt Facebook síðu Vaðlaheiðarganga, er útlit fyrir að mesti vatnshitinn sé nú að baki. Slíkt ætti að gera vinnuaðstæður enn bærilegri inni í göngunum, þó vel hafi gengið að ráða við hitann síðasta misserið.

Mynd: Rögnvaldur Már Helgason – RÚV

Í sumar fór mikil vinna í að þétta berg, til að vatn ætti ekki jafn greiða leið inn í göngin en auk þess til að fyrirbyggja að stór sprunga myndi opnast Eyjafjarðarmegin, líkt og gerðist Fnjóskadalsmegin. Af þeim sökum fór borgengið frekar hægt yfir og göngin lengdust aðeins um nokkra metra á viku.

Smám saman komst borgengið í betra berg og afköstin jukust að nýju. Um miðjan nóvember voru afköstin orðin ásættanleg, um 40 metrar á hverri viku. Meðalframvinda í gerð ganganna er 44 metrar á viku og á tímabili var hún komin niður í 14 metra. Besti árangurinn er hins vegar 96 metrar á viku.