Borun Laugaland – Lítið vatn, sundlaugar loka

Heimild:  

 

Nóvember 2017

Mynd Gunnar Stefánsson

Veitur hafa nú hætt borun í landi Götu við Laugaland. Markmið borunarinnar var að afla heits vatns og auka þannig nýtanlegan forða fyrir Rangárveitur er þjóna Rangárþingum og Ásahreppi að hluta. Á þessu svæði eru m.a. þéttbýliskjarnarnir Hella og Hvolsvöllur. Upphaflega var gert ráð fyrir að borholan yrði 1800m djúp en ákveðið var að dýpka holuna í von um að hitta á góðar vatnsæðar. Var borað niður á 1855m dýpi en árangur hefur ekki verið í takt við væntingar og núverandi aðstæður bjóða ekki upp á frekari borun á svæðinu. Veitur munu gera mælingar á holunni og taka ákvarðanir um frekari forðaöflun fyrir Rangárveitur í kjölfarið.

Eins og komið hefur fram dróst verktími á langinn. Nálægð borstaðarins við aðrar heitavatnsholur veitunnar gerði það að verkum að gæta þurfti sérstaklega að því að verja þær á meðan á borun stóð. Beita þurfti sérstakri aðferð sem reyndist erfiðari og tafsamari en gert var ráð fyrir og slökkva þurfti á dælingu úr nærliggjandi vinnsluholu vegna nálægðar hennar við nýju borholuna. Við það skertist framboð af heitu vatni á svæðinu og grípa þurfti til aðgerða, t.a.m. lokun sundlauga á Hellu, Hvolsvelli og Laugalandi.

Nú er staðan sú að veturinn er skollinn á og notkun á heitu vatni eykst samhliða því. Veitur þurfa því að gangsetja þá holu sem hvíld var á meðan á borun stóð. Búast má við að nokkra daga taki að ná jafnvægi í rekstri veitunnar. Á meðan verða sundlaugar lokaðar og hitastig vatnsins lægra hjá íbúum á jaðarsvæðum.

Starfsfólk Veitna þakkar íbúum fyrir þolinmæði og skilning á meðan á verkinu hefur staðið.

 

Laugaland( rauður hringur) og nærsveitir sem nýta vatn þaðan – Smella á mynd til að stækka

Fleira áhugavert: