Salerni Dyrhólaey – Standa auð ..vantar pípara!
Heimild: 
Júní 2017
Salernisbygging í Dyrhólaey, sem komið var upp í mars síðastliðnum, stendur auð. Upphaflega var ráðgert að húsið yrði tekið í notkun síðasta sumar en uppsetningin tafðist nokkuð. Nú er húsið hins vegar komin á sinn stað en allt harðlæst. Bryndís Fanney Harðardóttir, formaður skipulagsnefndar Mýrdalshrepps, er ósátt við stöðu mála. „Það hefur ekkert gerst í einn og hálfan mánuð.“
Verið er að færa bílaplanið á svæðinu að nýja salerninu en framkvæmdin hefur verið sett á ís vegna fuglavarps og verður fram haldið síðla sumars að varpi loknu. „Það er eins og andskotinn hafi gengið frá þessu,“ segir Bryndís. Framkvæmdin sé góð en það þurfi að ljúka verkinu.
Dyrhólaey er friðland og málefni hennar á könnu Umhverfisstofnunar. Þar fengust þau svör að ekki væri hægt að opna salernin því enginn fyndist til að hafa umsjón með þeim. Þá á einnig eftir að ganga frá pípulögnum á svæðinu.
„Það er mjög erfitt að fá iðnaðarmenn, sérstaklega pípara,“ segir Hákon Ásgeirsson hjá Umhverfisstofnun. Hann segist ekki þora að fullyrða hvenær hægt verði að opna salernin en vonast til að það verði sem fyrst.
Janúar 2017
Ný salernisaðstaða við Dyrhólaey kostar tæpar 40 milljónir, en stefnt er að því að hún verði komin í gagnið í mars 2017. Bæði þarf að leggja rafmagn og bora fyrir vatni á staðnum.
Heildarkostnaður við salernishúsið sjálft og uppsetningu þess og frágang er 28,5 milljónir kr. Gert er ráð fyrir að það muni kosta 200 kr. að nota klósettið og á það gjald að standa undir rekstri salernisins.
Umhverfisstofnun, sem fer með umsjón Dyrhólaeyjar, mun ráða starfskraft til að sinna þrifum og rekstri á salerninu, að því er fram kemur í Morgunblaðinu í dag.
