Stórskipahöfn Finnafirði – Orkuframboð gerir Finnafjörð góðan kost
Smella á myndir til að stækka
Segja má að eftir fund ríkisstjórnar í morgun þokist málið nær því að viljayfirlýsing verði undirrituð. Eins og fram hefur komið hefur sveitastjórn Langanesbyggðar samþykkt breytingar á óundirritaðri viljayfirlýsingu sem áður hafði verið samþykkt í sveitarstjórn. Auk Langanesbyggðar er gert ráð fyrir að Vopnafjarðarhreppur, íslenska ríkið, og Bremenport GmbH & Co. KG komi til með að undirrita mögulega viljayfirlýsingu. Í henni yrði kveðið á um þátttöku sveitarfélaganna Langanesbyggðar og Vopnafjarðarhrepps í verkefninu og að þau tækju ekki á sig fjárhagslegar skuldbindingar vegna þess.
Öruggt framboð af endurnýjanlegri orku á góðu verði er einn helsti kosturinn við að gera umskipunarhöfn fyrir norðurslóðasiglingar í Finnafirði á Langanesi. Þetta er mat sérfræðings á sviði norðurslóðamála.Fraktsiglingar um Norður-Íshaf eru ofarlega á baugi North Meets East-ráðstefnunnar sem nú stendur yfir á Akureyri. Í dag var þar kynnt rannsókn á hve fýsilegur kostur stórskipahöfn í Finnafirði er, samanborið við aðrar tvær stórar norðurslóðahafnir, Múrmansk í Rússlandi og Kirkenes í Noregi.
Höfundurinn segir Finnafjörð koma vel út úr þeim samanburði að mörgu leyti, þó ekki öllu. Hafnir séu nú þegar á hinum tveimur stöðunum og farið sé um þar á þessari leið.
Auk þess séu ýmsir óvissuþættir sem þurfi að rannsaka betur og til skamms tíma sé stórskipahöfn í Finnafirði því ekki endilega góður kostur.
Kosturinn sé hinsvegar endurnýjanlegir orkugjafar og ódýrt rafmagn miðað við verðlag á meginlandi Evrópu.
Hvað aðra kosti varðar, til dæmis í Eyjafirði eða á Austfjörðum segir Bianca að tæknilegir erfiðleikar gætu fylgt því að stækka hafnir sem nú þegar eru til staðar.
Heimild: RÚV
