Lést af völdum raflosts þegar hann missti farsímann sinn ofan í baðkarið

19 ára unglingurinn lést á hörmulegan hátt nýlega þegar hann missti farsímann sinn ofan í baðkarið á meðan hann var í baði. Síminn var í hleðslu og því fékk unglingurinn raflost og lést af völdum þess.

Unglingurinn, sem hefur verið nefndur Alexandr M í rússneskum fjölmiðlum, bjó ásamt fjölskyldu sinni í Zapoliarny í lýðveldinu Komi sem er hluti af Rússlandi. Bróðir hans fann hann í baðkarinu en hann fór að athuga með hann þegar honum fannst bróðirinn hafa verið óeðlilega lengi í baði.

Alexandr

Hann neyddist til að brjóta upp dyrnar til að komast inn á baðherbergið og fann þá bróður sinn liggjandi í baðkarinu með stórt brunasár á maganum og farsímann fljótandi við hlið hans.

Mirror segir að krufning hafi leitt í ljós að Alexandr hafi látist af völdum raflosts. Talið er að síminn hafi runnið úr höndum hans og lent í vatninu og orðið honum að bana. Svipað slys varð í Moskvu í síðasta mánuði þegar 14 ára stúlka missti farsíma ofan í baðkar á meðan hún var í baði en sími hennar var einnig í hleðslu.

Heimild: Pressan